Françoise Marcelle. Nos scrîjeûs

Èmn-ome a mô sès dints, 

pôuve ome. Il-èst maleûreûs come ça n’èst nén d’èl dîre ! Vos savèz bén qu’awè mô sès dints, c’èst pou dèv’ni èradji, èn’ no.

L’ôte djoû, i-n-a tout l’ minme saquantès sèmènes, il-a stî ô

rèstôrant avè sès cous ́, in bia rèstôrant d’ Maubeuge qui chêrt come spècialitè du nuzome lapin as prones. Èmn-ome, bén seûr què c’èst s’ gout, in bon lapin as prones. Vous ́ gadjî què vos-ôtes ètou, c’èst vo goût !

Tout d’in coûp, an-agnant su in rwoyâl boukèt d’ cwisse, il-a pinsè qu’ sès machèles astin ́ dèsbèrlindjîyes ! Il-a yeû d’ l’èlècticitè dèl pwinte dè sès tch’veûs djusqu’ô d’ dèbout d’ sès-årtias. Il-a sinti boudjî ’ne saquè ’ne sadju dins s’ bouche èt il-a pinsè qu’i daloût tchér ́ fèbe.

Asseûrè què ç’ lapén la n’avoût nén stî al’vè dins ’ne gayole, ç’astoût in blanc cu v’nu dirèk du cacheû a s’n-assiète... ou bén d’ l’afuteû a s’n-assiète, alèz savwo, paç’ què çu qu’i s’avoût passè, c’èst qu’il- avoût agni su in plomb d’ chasse. Dins tous lès cas, c’èst bén ç’ qu’o lome a ç’te eûre an francès in circuit court , pou m’n-ome, ç’astoût pu råde in court circuit

.

Dèspûs, èmn-ome a mô sès dints, poûve ome !

Dju n’ va nén vos spliquî toutes lès quéntes pou trouvér in dantisse, paç’ què l’ preumî qui l’a vèyu al clinique, a cénq eûres ô nût, avoût dandji d’ène radio èt, come èl radiolojîye astoût sèréye, faloût r’vèni in ôte coûp... èt co payî ’ne visite, asård ?

Èmn-ome, ça l’a fét andêvér, ça fét qu’il-a stî vîr un deûsième dantisse. Èçti la a fét ’ne radio qui n’a rén moustrè dè skètè ; il-a arindji saquants brokes èt rabistokè ’ne miyète èl dèvanture mès come i n’èst nén aracheû d’ dints, il-a èvoyi m’n-ome dèlé in paradontologiste paç’ qu’i faleut vîr combén ç’ qu’i-n-aveut d’ dints a satchî pou n’ pus awo mô. 

Èl rendez-vous, ç’ astoût twos mwos pus tård... Adon, in ratindant, èmn-ome a toudis mô sès dints, poûve ome !

Il-a d’dja pris deûs coûps dès antibiotiques paç’ què l’infècsion s’a mètu al pwinte dè yun d’ sès dints, èl cén qu’il-a agni avè, d’ssus l’fameûs plomb d’ cacheû.

La ô d’zeûr, èm pa, pou l’ fé amarvoyî, a stî li spliquî què ç’ què ç’astoût, ô bon vî tans passè, in-aracheû d’ dints : ç’ astoût èn-ome qui v’noût su lès martchis avè ’ne tchèrète a bras pou sès-ostis èt surtout in cous ́ pou djuwér du gros tambour. Tant qu’ l’aracheû d’ dints fèyoût s’ bouye, l’ôte djuwoût du tambour tous sès pus foûrts pou èpétchî lès djins d’ètinde lès sclamûres du cén qu’on bouriate.

Dèspûs, èm poûve ome fét dès tchôk’mârs, i s’èrdrèsse tout èdoûrmi dins s’ lit èt i crîye :

« Pont d’ tambour, pont d’ tambour ! »

Èl twozième dintisse què m’n-ome a sti vîr, c’èst l’ bon, parèt-i. I sét fé lès radios, i sét sognî lès chabotes èt i sét royî tafèt’mint lès dints.

I n’a pus qu’ saquants djoûs a ratinde pou yèsse quite dès-angouches.

Dju vos dîré bén råde çu qui va chûre.

An ratindant d’ yèsse quite dè ses dints, èmn-ome èst d’dja quite d’ène masse dè liårds, èt c’èst seûr qu’ i n’ peut pus sinte lès blancs cus come èl cén d’ Maubeuge, paç’ què ç’ ti la, on peut minme dîre qu’i l’a su l’ gros dint qu’i vwot l’ pus vol’tî...

Françoise MARCELLE

walon d’ Souvrèt (Souvret)

Nos zûnâdjes

Nos scrîjeûs : Liliane Groulard

Is-ont scapè trwès SDF

I gn-a saquants mwès, ène lète dè m’ camarâde dè France comincheut insi :

« Lili èst môrt a Pâques ».Lili, c’èst l’ nom dè s’ tchat ; c’èst drole pou in mâle mins, an Bretagne, c’èst normal, parèt-i. « Il-asteut malâde dèspûs dès mwès èy’ on s’i atindeut, mins quand c’è- st-ène saqui qu’on vwèt vol’tî, c’èst toudis trop timpe ! Il-aveut quatôze ans èt nos-avons du muchî no pwène dins no keûr sins l’ dîre a persone.

Nén l’invîye d’in r’prinde in-ôte a ç’te eûre, paç’ qu’in tchat n’ ramplace jamés in-ôte ! Mins èl vûde ît trop grand èt, avou m’n-ome, on pinseut quand minme dè r’prinde in-ôte ô mwès d’octôbe quand nos s’rîs r’vènus d’Indonésîye.

Èl quinze dè juyèt, nos pèrdons nos vélos pou dalér fé in toûr èyèt tout d’in côp, nos crwèsons trwès tchats. Is-avîn ́ mô bèle ér ́, dès misèrâbes, dès vrés SDF !

Èl moman, put-ète in-an, èyèt deûs djônes d’a pwène trwès mwès. Is-astît sètchs come dès côps d’ trique, èyèt vrémint nén bias ! Claude m’a r’wéti, nos nos-avons compris èt, sins rén dîre, nos lès-avons pris paç’ qu’on vwèyeut bén qu’is stît abandonès, pièrdus. Nos lès-avons pôrtè d’lé in vètèrinére. Èl moman èy’ yun dès p’tits n’avît qu’in-î. Is-avît èl gale, dès pûs, dès puces, dès tiques èyèt dès viêrs. Is-ont stî bén sognis, èt malgrè qu’on n’esteut nén an-octôbe, nos n’avons choûtè qu’ no keûr, nos lès-avons wârdè. Dèspûs adon, is pass’neut dès-eûreûs djoûs d’lé nous-ôtes.

Is fèy’neut ène masse dè brût an s’ pourchûvant yun l’ôte dins l’môjo, mins nos-avons ètou branmint dès doudoûces ! Èl moman qui asteut toute pèléye èst dèv’nûwe ène bèle tchate angora qu’on-a lomè Bobète. Sès deûs djônes, Sacha, blanc avou dès grîjès tatches, l’ôte, Michka, gris avou dès blanchès tatches, sont dès gros ronroneûs èyèt dès fameûs-arnôjes ! Bobète èt Sacha sont d’ssus m’ bûrô, is mè r’wét’neut vos scrîre. Bén seûr, nos r’grètons Lili, mins c’èst drole come on s’atatche co râde, surtout què roci, leû môrt n’asteut sûr’mint nén lon ».

Èn ́ dîreut-on nén in conte pou l’ Nowé ? 

"Chat alors !"

Liliane GROULARD

walon d’ Mârciène ( Marchienne-au-Pont)

in " èl bourdon" 694